साईकिरण टाइम्स | राजेश बोरुडे
श्रीरामपूर : श्रीरामपूर नगरपालिका हद्दीतील दशमेश चौकाची अवस्था पाहता ‘नगरपालिका आहे तरी कुठे?’ असा संतप्त सवाल नागरिकांना पडला आहे. चौकातील रस्त्यावर मोठमोठे खड्डे पडले आहेत, सर्वत्र अस्ताव्यस्त वाहतूक आहे, रस्त्यावरच भाजीपाला विक्रेते बसत आहेत आणि त्यातून रोज वाहतूक कोंडीची परिस्थिती निर्माण होत आहे. मात्र, या सगळ्या गंभीर समस्यांकडे पालिका प्रशासनाने जाणीवपूर्वक डोळेझाक केली आहे का? असा सवाल उपस्थित होत आहे.
'दशमेश चौक' हा शहरातील महत्त्वाचा आणि वर्दळीचा परिसर. याच मार्गावरून शालेय विद्यार्थी, महाविद्यालयीन विद्यार्थी, महिला, ज्येष्ठ नागरिक आणि हजारो वाहनचालक दररोज ये-जा करतात. मात्र,नागरिकांच्या सुरक्षिततेची कोणतीही काळजी नसल्याचे चित्र सध्या दिसत आहे.
खड्ड्यांचे साम्राज्य; वाहनचालकांची रोज जीवघेणी कसरत!
चौकातील रस्त्यावर पडलेल्या मोठमोठ्या खड्ड्यांमुळे वाहनचालकांना वाहन चालवताना अक्षरशः कसरत करावी लागत आहे. खड्डे चुकवताना वाहने एकमेकांच्या मार्गात येतात आणि अपघाताचा धोका वाढतो. रस्त्याची डागडुजी करण्यासाठी अपघात घडण्याची वाट पालिका प्रशासन पाहत आहे का? असा संतप्त सवाल नागरिक विचारत आहेत.
रस्ता की भाजी मंडई? पालिकेचा ‘मूक’ कारभार!
चौकातील वाहतुकीच्या रस्त्यावरच भाजीपाला विक्रेते बसत असल्याने रस्ता अरुंद झाला आहे. वाहनांना जाण्यासाठी जागा कमी पडत असून त्यातून वाहतूक कोंडी निर्माण होत आहे. रस्त्यावर अडथळे निर्माण होत असताना पालिकेच्या संबंधित अधिकाऱ्यांना ते दिसत नाहीत का? की कारवाई करण्यासाठी एखादा मोठा अपघात होण्याची प्रतीक्षा केली जात आहे?
छोटे-मोठे अपघात झाले तरी प्रशासनाला जाग नाही?
दशमेश चौकातील खड्डे आणि वाहतूक कोंडीमुळे छोटे-मोठे अपघात होण्याचा धोका कायम आहे. विशेषतः विद्यार्थ्यांची मोठ्या प्रमाणावर ये-जा असताना प्रशासनाचे हे दुर्लक्ष अधिक गंभीर ठरते. एखाद्या विद्यार्थ्याला किंवा नागरिकाला गंभीर दुखापत झाल्यानंतरच पालिका प्रशासनाचे डोळे उघडणार आहेत का?
पालिकेचा कारभार कागदावरच; रस्त्यावर मात्र खड्डे!
शहरातील रस्ते, वाहतूक व्यवस्था आणि नागरिकांची सुरक्षितता ही नगरपालिका प्रशासनाची मूलभूत जबाबदारी आहे. मात्र दशमेश चौकातील परिस्थिती पाहता नियोजनाचा आणि प्रत्यक्ष अंमलबजावणीचा पूर्णपणे बोजवारा उडाल्याचे चित्र दिसत आहे. नागरिकांकडून समस्या वारंवार मांडल्या जात असतील, तरी त्यावर तातडीने उपाययोजना न करणे हे पालिका प्रशासनाच्या निष्क्रियतेचे आणि अक्षम्य दुर्लक्षाचे लक्षण असल्याची संतप्त भावना नागरिक व्यक्त करत आहेत.
आता तरी जागे व्हा; अन्यथा जबाबदार कोण?
दशमेश चौकातील सर्व खड्डे तातडीने बुजवावेत, रस्त्याची दुरुस्ती करावी, वाहतुकीला अडथळा ठरणारे अतिक्रमण व रस्त्यावर बसणारे विक्रेते हटवावेत आणि चौकाची वाहतूक व्यवस्था सुरळीत करावी, अशी जोरदार मागणी नागरिकांकडून होत आहे. नागरिकांकडून कर वसूल करण्यापुरतीच नगरपालिका आहे का? नागरिकांना सुरक्षित रस्ते देण्याची जबाबदारी कोणाची? दशमेश चौकातील परिस्थितीला आता तरी पालिका प्रशासनाने गांभीर्याने घेतले नाही, तर उद्या एखादी मोठी दुर्घटना घडल्यास त्याची नैतिक व प्रशासकीय जबाबदारी कोणाची, याचे उत्तर पालिका प्रशासनाला द्यावे लागेल.
“अपघात होण्याची वाट पाहू नका; आधी रस्ता दुरुस्त करा!”
“दशमेश चौक नागरिकांसाठी मोकळा आणि सुरक्षित करा!”