श्रीरामपूर नगरपारिषद हद्दीतील प्रभाग क्रमांक एक मधील अत्यंत दाट लोकवस्ती असलेल्या गोंधवणी परिसरात वर्षानुवर्षांपूर्वी केलेल्या गटारींची पुरती 'वाट' लागल्याने नागरिकांना मार्गक्रमण करण्यासाठी 'वाट' राहिली नाही. तुटक्या-फुटक्या, तुंबलेल्या गटारींमधून रस्त्यावर मैलामिश्रित पाणी वाहू लागल्याने नागरिकांना मोठा त्रास सहन करावा लागत आहे. प्रभागातील नगरसेवकांसह, पालिका प्रशासनाचे या परिसरात दुर्लक्ष होत असून या भागाला कुणी 'वाली' आहे का नाही? असा सवाल याठिकाणी उपस्थित होत आहे.
२० ते २५ वर्षांपासून येथील अंतर्गत रस्त्याचे काम झालेले नाही. गटारी तुंबल्या आहेत. रस्त्यावर गटारींचा मैला वाहू लागला आहे. गटारींची दुरुस्ती करून रस्त्याचे काम करण्यात यावे; अन्यथा आंदोलन छेडण्यात येईल.
- प्रविण कोल्हे, उत्तर महाराष्ट्र अध्यक्ष, छावा मराठा युवा संघटना.
