साईकिरण टाइम्स | 11 ऑक्टोबर 2020
मागील अनेक महिन्यांपासून कोरोना विषाणूने जगभर हाहाकार माजवला. यात अनेकांचे जीवही गेले. कोरोनावर लस कधी येणार याची सर्वजन वाट पाहत आहेत. लवकरच कोरोनावर लस उपलब्ध होण्याची शक्यता लक्षात घेऊन राज्य पातळीवर लस वाटप कशी करायची याची तयारी सुरु झाल्याचे संकेत मिळू लागले आहेत.
येत्या काही दिवसात लस आल्यास त्यासाठी शीत साखळी कुठे आहे? प्राथमिक आरोग्य केंद्र किती आहेत? ग्रामीण रुग्णालय किती? उपजिल्हा रुग्णालयात लस देणाऱ्या व्यक्तीचे नाव काय? मोबाईल क्रमांक काय? पर्यवेक्षक कोण असेल ? लस देण्याचे ठिकाण कुठलं असेल? त्याचा पिन कोड नंबर काय? ही सगळी माहिती संकलित करण्याचे काम सुरू झाले आहे. लस साठा आणि शीत साखळीची माहिती संकलित करण्याचे आदेश माता बाल संगोपन व शालेय आरोग्य विभागाच्या अतिरिक्त संचालकांनी जिल्हा परिषदेच्या आरोग्य अधिकाऱ्यांना दिले आहेत. आरोग्य विभागाच्या या पूर्वतयारीच्या आदेशामुळे लवकरच लस उपलब्ध होईल असा आशेचा किरण दिसू लागला आहे. आरोग्य विभागाने किती प्रमाणात लस लागणार, याविषयीची माहिती संकलित करायला सुरुवात केली आहे. यासंदर्भात पुण्याच्या राज्य कुटुंब कल्याण कार्यालयाच्या अतिरिक्त संचालकांनी 8 ऑक्टोबरला जिल्हा आरोग्य अधिकारी, जिल्हा शल्य चिकित्सक आणि महानगरपालिकेच्या आरोग्य अधिकाऱ्यांना पत्र पाठवलं आहे. या पत्रातून कोरोना लस लागणाऱ्या संभाव्य साठ्याची माहिती मागवली आहे. लस साठा आणि शीतसाखळी व्यवस्थापनासाठी पूर्वनियोजन करण्याच्या सूचना केंद्र शासनाने दिले आहेत. त्यानुसार नियोजन करण्यासाठी 16 ऑक्टोबरपर्यंत सार्वजनिक आरोग्य परिचारकांच्या माध्यमातून ही सगळी माहिती जमा केली जात आहे.