साईकिरण टाइम्स ब्युरो, 18 एप्रिल 2020
उक्कलगाव|प्रतिनिधी|तालुक्यातील उक्कलगाव शिवारातील लम्हाणबाबा परिसरात गेल्या आठ ते नऊ दिवसांपासून बिबटयाचा मोठ्या प्रमाणावर वावर असल्याचे स्पष्ट झाले असून लम्हाणबाबा परिसरातील जगधने वस्ती नजीकच्या नवनाथ गडाख यांच्या वस्तीवर गुरुवारी रात्रीच्या सुमारास दरवाजाच्या शेजारील कपाटात बसलेला कुत्र्याला बिबट्याने नजीकच्या उसात फडफडत नेत फस्त केले. आवाजाने जाग आल्याने डोळ्यादेखत बिबटयाने कुत्रे नेल्याचा प्रसंग गडाख यांनी पाहिला होता.
उक्कलगाव | लम्हाणबाबा शिवारात बिबटयाचे ताजे माग उसाच्या शेतात आढळून आले. ( छाया : भरत थोरात )
धनवाट परिसरात व लम्हाणबाबा शिवारात सातत्याने बिबटयाचा वावर असल्याने याठिकाणी पिंजरे लावण्यात यावेत, तसेच ज्याठिकाणी बिबटयाचा वावर नसेल ते पिंजरे वावर असल्याठिकाणी लावण्यात यावेत, अशी मागणी नागरिकांनी केली असतानाच गळनिंब शिवारात दोन पिंजरे धूळखात पडून आहे.
लम्हाणबाबा शिवारात अनेक दिवसांपासून पिजंरा लावण्यात यावा मागणी असतांनाच त्यांनीही कोरोनाची भीती दाखवत हात झटकल्याने शेतकरी आणखी संकटात सापडला आहे जर मानवी वस्तीत बिबटया घुसल्यास मोठा अनर्थ घडल्यास यास जबाबदार कोण? असा उपस्थित सवाल शेतकरी वर्गातून विचारला जात आहे.
सदर बिबटे एक नसून संख्येत वाढ झाली आहे त्यामागे बिबटे व मादी बिबट्या, बछडे असल्याचे प्रत्यक्षदर्शीनी पाहिले आहे, त्यामुळे हा प्रकार गांभिर्याने घेण्याची गरज आहे.