‘अशोक’चा बुधवारी बॉयलर अग्निप्रदिपन समारंभ

श्रीरामपूर : अशोक सहकारी साखर कारखान्याचा सन २०२२-२३ च्या गळीत हंगामाचा बॉयलर अग्निप्रदीपन समारंभ  बुधवार दिनांक ५ ऑक्टोबर २०२२ रोजी सकाळी १० वाजता दसऱ्याच्या मुहुर्तावर अशोक उद्योग समुहाचे सूत्रधार व चेअरमन माजी आमदार भानुदास मुरकुटे यांच्या अध्यक्षतेखाली तसेच महाराष्ट्र राज्य साखर कामगार प्रतिनिधी मंडळाचे कार्याध्यक्ष अविनाश आपटे काका यांचे प्रमुख उपस्थितीत संपन्न होणार असल्याची माहिती कारखान्याचे व्हा.चेअरमन भाऊसाहेब उंडे यांनी दिली. 

श्री.उंडे म्हणाले की, अशोक सहकारी साखर कारखान्याचा सन २0२२-२३ या वर्षीचा गळीत हंगाम १५ ऑक्टोबरपासून सुरु करण्याचा व्यवस्थापनाचा प्रयत्न आहे. त्यादृष्टीने ऑफ सिझनमधील देखभाल व दुरुस्तीची कामे पूर्ण करुन हंगाम निर्धारित वेळेत सुरु करण्याची तयारी झाली आहे. कारखान्याचा बॉयलर अग्निप्रदीपन समारंभ दसऱ्याच्या मुहुर्तावर बुधवार दि.५ ऑक्टोबर रोजी सकाळी १० वा. कारखान्याचे संचालक श्री.ज्ञानेश्वर काळे व त्यांच्या पत्नी सौ.सोनाली ज्ञानेश्वर काळे तसेच कारखान्याचे डेप्यु. चीफ केमिस्ट श्री.जालिंदर दसपुते व त्यांच्या पत्नी सौ.शीतल जालिंदर दसपुते या दाम्पत्यांचे हस्ते विधीवत पूजन करुन संपन्न होणार आहे.

सदर प्रसंगी कारखान्याचे सभासद, ऊस उत्पादक व हितचिंतक आदिंनी उपस्थित रहावे, असे आवाहन व्हा.चेअरमन भाऊसाहेब उंडे, संचालक मंडळाचे सदस्य तसेच कार्यकारी संचालक संतोष देवकर यांनी केले आहे.