साईकिरण टाइम्स ब्युरो, 22 जुलै 2020
घोडेगाव (दादा दरंदले) कोरोना (कोव्हिड-19) मुळे उद्धवलेल्या संसर्गजन्य परिस्थितीचा विचार करता या वर्षी बकरी ईद साध्या पदध्तीने साजरी करावी, असे आवाहन सोनई,घोडेगाव,चांदा या ठिकाणी घेण्यात आलेल्या मुस्लिम बांधवांच्या बकरीईद या संवाद बैठकीत सोनई पोलीस स्टेशन चे सहायक पोलिस निरीक्षक जनार्दन सोनवणे व गोपनीय शाखेचे पोहेकॉ बाबा वाघमोडे यांनी केले.
उपस्थित मुस्लिम बांधवांना बकरीईद च्या काळात कशा प्रकारे खबरदारी घ्यावी या संदर्भातील सूचना देण्यात आल्या यावेळी मुस्लिम समाजाचे लोक उपस्थित होते यावेळी सोशल डिस्टंसिंग चे काटेकोर पालन करण्यात आले..
मार्गदर्शक सूचना...
1- कोव्हिड-19 मुळे उद्धवलेल्या संसर्गजन्य परिस्थितीत राज्यात सर्व धार्मिक कार्यक्रमांना बंदी आहे. त्यास अनुसरुन बकरी ईदची नमाज मस्जिद अथवा ईदगाह अथवा सार्वजनिक ठिकाणी अदा न करता, नागरिकांनी आपल्या घरीच अदा करावी.
2- सध्या कार्यान्वीत असणारे जनावरांचे बाजार बंद राहतील. नागरिकांना जनावरे खरेदी करावयाची असल्यास त्यांनी ऑनलाईन पध्दतीने अथवा दूरध्वनीवरुन जनावरे खरेदी करावी.
3- नागरिकांनी शक्यतो प्रतिकात्मक कुर्बानी करावी.
4- प्रतिबंधित (Containment) क्षेत्रामध्ये सध्या लागू करण्यात आलेले निर्बंध कायम राहतील. त्यामध्ये बकरी ईद निमित्त कोणतीही शिथीलता देता येणार नाही.
5- बकरी ईदच्या निमित्ताने नागरिकांनी कुठल्याही सार्वजनिक ठिकाणी गर्दी करु नये किंवा एकत्र जमू नये.
6- कोव्हिड-19 या विषाणूचा प्रादूर्भाव रोखण्यासाठी शासनाच्या मदत व पुनर्वसन, आरोग्य, पर्यावरण, वैद्यकीय शिक्षण विभाग तसेच संबंधित महापालिका, पोलीस, स्थानिक प्रशासन यांनी विहीत केलेल्या नियमांचे अनुपालन करणे बंधनकारक राहील.
तसेच या परिपत्रकानंतर व प्रत्यक्ष सण सुरु होण्याच्या मधल्या कालावधीत अजून काही सूचना प्रसिध्द झाल्यास त्यांचे देखील अनुपालन करावे.