साईकिरण टाइम्स ब्युरो, 23 एप्रिल 2020
अहमदनगर | अहमदनगर जिल्ह्यात आत्तापर्यंत 20 जण कोरोनामुक्त झाले आहेत. बूथ हॉस्पिटलमध्ये सध्या 11 जणांवर उपचार सुरू आहेत. तब्बल 20 जणांनी कोरोनावर मात केली असल्याने अहमदनगर जिल्ह्याची कोरोनामुक्तीकडे यशस्वी वाटचाल चालू असल्याचे दिसत आहे. दरम्यान, बुधवारी ( दि. 22) रात्री जिल्हा रुग्णालयाने पुणे येथील लष्करी वैद्यकीय महाविद्यालयाकडे पाठविलेल्या अहवालापैकी 2 जणांचे अहवाल पॉझिटिव्ह आले आहेत. हे दोघेही जामखेड येथील आहेत. करोना बाधित व्यक्तीच्या संपर्कात आल्याने या दोघांना लागण झाली आहे. त्यामुळे काहीशी चिंता वाढली आहे. जिल्ह्यातील बाधितांची संख्या आता 33 झाली आहे.
जामखेड येथील एका व्यक्तीचा मागील आठवड्यात मृत्यू झाला होता. त्या व्यक्तीची दोन्ही मुले कोरोनाबाधित झाले. या दोन्ही मुलांच्या संपर्कात आलेल्या व्यक्तीचे स्त्राव नमुने तपासणीसाठी पुण्याला पाठवण्यात आले होते. त्यापैकी 2 जणांचे अहवाल बुधवारी रात्री उशीरा प्राप्त झाले असून ते पॉझिटिव्ह आले होते. त्यामुळे त्यांना करोनाची लागण झाल्याचे स्पष्ट झाले असून या दोघांनाही उपचारासाठी बूथ हॉस्पिटलमधील आयसोलेशन वार्डमध्ये पाठवण्यात आले आहे.
जिल्ह्यात लोणी (ता. राहाता) आणि मुकुंदनगर (नगर शहर) येथील 2 कोरोना बाधित्तांचा 14 दिवसानंतर दोन्ही अहवाल निगेटिव्ह आल्याने त्यांना बुधवारी ( दि. 22) बूथ हॉस्पीटलमधून डिस्चार्ज देण्यात आला. बुधवारी ( दि. 22) दुपारी त्यांना बूथ हॉस्पिटल मधून हॉस्पिटल देखरेखीखाली लोणी आणि नगर शहरातील एका रुग्णालयात दाखल करण्यात आले.या दोन्ही रुग्णांची तब्बेत चांगली असल्याचे जिल्हा आरोग्य यंत्रणेने स्पष्ट केले.
दरम्यान, आतापर्यंत जिल्ह्यातील कोरोना बाधितपैकी २० जण बरे झाले आहेत. तर, कोपरगाव येथील 1 व जामखेड येथील 1 अशा 2 जणांचा मृत्यु झाला आहे. सध्या येथील बूथ हॉस्पिटलमध्ये 9 जणांवर उपचार सुरू आहेत. त्यामध्ये नेवासा येथील दोन, जामखेड येथील दोन, आलमगीर (ता.नगर) येथील तीन, आष्टी (जि.बीड) येथील एक व आयव्हरी कोस्ट येथील एक परदेशी नागरिक यांचा समावेश आहे.
जिल्ह्यात बारा मार्चला पहिला कोरोना बाधित रुग्ण आढळल्यानंतर मार्चचा शेवटचा आणि एप्रिलचा पहिला आठवडा रुग्ण वाढीचा ठरला. आरोग्य विभागतर्फे नागरी आणि ग्रामीण अशी विभागणी करण्यात आलेली आहे. नगर तालुक्याच्या विचार करता महानगरपालिका हद्द व तालुक्यातील आलमगीर येथे मिळून आतापर्यंत 11 रुग्ण आढळले असून यापैकी 8 जण बरे झाले असून त्यांना हॉस्पिटलमधून डिस्चार्ज दिला आहे. तर, तीन जणांवर उपचार सुरू आहेत. दरम्यान, बुधवारी आणखी 26 जणांचे अहवाल प्राप्त झाले असून हे सर्व अहवाल निगेटिव्ह असल्याची माहितीही त्यांनी दिली.