इलेक्ट्रॉनिक माध्यमातील पत्रकार सहकारी पांडुरंग रायकर यांचा कोरोनाने निधन झाले. दुर्देवाने त्यांना वेळेवर उपचार मिळाले नाही. माध्यमांचे काम करताना पत्रकार १०० % सेवाभावाने आपले योगदान देत असतो. इतरांचे न्याय, हक्क मिळवून देण्यासाठी तो संघर्ष करीत असतो. कुटुंबाचे दु:ख विसरुन इतरांच्या दु:खात तो नेहमीच सहभागी असतो. पत्रकार म्हणून कार्य करताना त्याला कुटुंबाची देखील जबाबदारी पेळावी लागते. या कोरोनाच्या संकटकाळात पत्रकारांना संरक्षण देण्याच्या भावनेने घेण्यात आलेला उपक्रम कौतुकास्पद असल्याची, भावना आमदार निलेश लंके यांनी व्यक्त केली.
अहमदनगर इलेक्ट्रॉनिक मीडिया असोसिएशन व पारनेर येथील शिवसेनेचे नगरसेवक मुद्दसर सय्यद यांच्या पुढाकाराने अहमदनगर शहरातील वृत्तवाहिनीच्या प्रतिनिधींना आमदार निलेश लंके यांच्या हस्ते कोरोना पॉलीसीचे वाटप करण्यात आले. यावेळी आमदार लंके बोलत होते. याप्रसंगी शिवसेना नगरसेवक मुद्दसर सय्यद व सर्व वृत्तवाहिन्यांचे प्रतिनिधी उपस्थित होते.
महाराष्ट्रासह संपूर्ण देशात असलेल्या कोरोनाच्या लॉकडाऊन काळात आपल्या जीवावर उदार होऊन प्रत्येक बातमी जनमानसापर्यंत पोहचवीण्यासाठी अहमदनगर जिल्ह्यासह महाराष्ट्रातील माध्यमातील बातमीदारी करत होते. दरम्यानच्या काळात देखील अनेक माध्यम प्रतिनिधींनां कोरोना झाला होता. यामध्ये पांडुरंग रायकर या प्रतिनिधीचे कोरोनाने निधन झाले होते. कोरोनामुळे सुरू झालेल्या लॉकडाऊन प्रक्रियेनंतर आता अनलॉक सुरू झाला आहे. अनलॉक सुरू झाला असला तरी अनलॉकमुळे वाढती गर्दी, त्या गर्दीत जाऊन करावी लागणारी बातमीदारी, या सगळंयाचा विचार करून अहमदनगर शहरातील वृत्तवाहिनीच्या प्रतिनिधींना कोरोनाचे विमा संरक्षण देण्यात आले असल्याचे इलेक्ट्रॉनिक मीडिया असोसिएशनचे अध्यक्ष उमेर सय्यद यांनी स्पष्ट केले.
वाटप करण्यात आलेली कोरोना पॉलीसी ही 1 लाख रुपयाची असून, वृत्तवाहिनीचा प्रतिनिधी हा कोरोना पॉजेटिव्ह आढळून आल्यास त्याला या पॉलीसीची मदत होणार असल्याचे प्रास्ताविकात सचिव लैलेश बारगजे यांनी सांगितले. कार्यक्रमाचे सूत्रसंचालन उध्दव काळापहाड यांनी केले. आभार उपाध्यक्ष कुणाल जायकर यांनी मानले. या कार्यक्रमाप्रसंगी सहसचिव रोहित वाळके, खजिनदार निखिल चौकर, सुशील थोरात, सागर दुस्सल, संजयकूमार पाठक यांच्यासह माध्यम प्रतिनिधी व सदस्य उपस्थित होते. पारनेरचे नगरसेवक मुद्दसर सय्यद यांनी पत्रकार बंधुंच्या पाॅलीसी उपक्रम स्वागत करुन भविष्यात जिल्ह्यात, तालुक्यात अशा प्रकारे लोकशाहीचा चौथा स्तंभ म्हणुन नक्कीच पत्रकार बंधुंच्या आरोग्यासाठी लोकप्रतिनिधी, उद्योजक पुढे येतील, तसेच पत्रकार जिल्हा कल्याणकारी मंडळ स्थापन करुन निश्चितच पत्रकार तसेच त्यांचा कुटुंबाना न्याय देण्यासाठी कट्टीबद्ध राहणार असल्याचे जिल्हा ग्रामीण पत्रकार संघटनेचे जिल्हाप्रमुख बाळासाहेब नवगिरे यांनी सांगितले.